Боловсролын Хамтын Ажиллагааны Нийгэмлэг (БХАН) нь Монголын Нээлттэй Нийгэм Хүрээлэн буюу Соросын сангийн боловсролын хөтөлбөрүүдийг үргэлжлүүлэн 2004 оны 8-р сард байгуулагдсан, Монголын боловсролын салбарт үйлчилдэг төрийн бус байгууллага юм. БХАН-ийн эрхэм зорилго нь Монголын залуу үеийнхэнд хүртээмжтэй, тэгш хамруулсан, чанартай боловсрол олгохын төлөө үр нөлөөтэй түншлэлийг хөгжүүлэн, бодлогод нөлөөлж, боловсролын байгууллага, оролцогч талуудын чадавхыг бэхжүүлэхэд оршино. Энэхүү зорилгын хүрээнд бага насны хүүхдийн хөгжлийг дэмжих “Алхам алхмаар” хөтөлбөр, өсвөр үеийнхэн, залуучуудын хөгжлийг дэмжих “Хүүхэд, залуучуудын хөтөлбөр”, сургууль, багшийн хөгжлийг дэмжих төсөл хөтөлбөрүүд, боловсролын судалгаа, төсөл, хөтөлбөрийн үнэлгээ зэрэг чиглэлээр идэвхтэй үйл ажиллагаа явуулдаг.